అనుకున్నదొక్కటి, అయినదొకటి
- LV Jaya
- Mar 9
- 6 min read
#అత్తగారికథలు #అత్తాకోడళ్ళకథలు, #LVJaya, #LVజయ, #AnukunndokkatiAyinadokati, #అనుకున్నదొక్కటిఅయినదొకటి
Anukunndokkati Ayinadokati - New Telugu Story Written By L. V. Jaya
Published in manatelugukathalu.com on 09/03/2025
అనుకున్నదొక్కటి అయినదొకటి - తెలుగు కథ (అత్తగారి కథలు - పార్ట్ 11)
రచన: L. V. జయ
కథా పఠనం: మల్లవరపు సీతారాం కుమార్
జాగృతిని అత్తగారింటి పంపిస్తూ ఎన్నో జాగ్రత్తలు చెప్పింది వాళ్ళ అమ్మా లత. "జాగృతి, మీ అత్తగారి తరపు వాళ్ళందరూ వేదాంత పండితులుట. మీ మావగారి తరపువాళ్ళు, బాగా
చదువుకున్నవాళ్ళు, పెద్ద పెద్ద ఉద్యోగాలలో ఉన్నవాళ్ళుట. వాళ్ళకి మర్యాద, మన్ననలు, పద్దతి, సంప్రదాయాలు చాలా ఎక్కువని మీ అత్తగారు చెప్పారు. అలాంటివాళ్ళ ఇంటికి కోడలిగా వెళ్తున్నావు. జాగ్రత్తగా ఉండు. అందరితో ఆచితూచి మాట్లాడు" అంది లత.
సహజంగానే నెమ్మదస్తురాలైన జాగృతి, అత్తగారింట్లో అడుగుపెట్టిన రోజు, భయంతో ఎవరితోనూ ఒక్క మాట కూడా మాట్లాడకుండా గడిపింది.
మర్నాడు ఉదయం, టీవీ లో సుప్రభాతం మొదలయ్యే సమయానికి లేచింది జాగృతి. అప్పటికే లేచున్న జాగృతి అత్తగారు రాధ, ఇంటి బయట ముగ్గులు వేస్తుంటే, మావగారు మాణిక్యాలరావు, ఇంటి బయట అరుగుమీద న్యూస్ పేపర్ చదువుతున్నాడు. సుప్రభాతం అయ్యే సమయానికి లేచాడు జాగృతి భర్త సమర్థ్. తరువాత వచ్చిన అన్నమయ్య పాటలు వింటూ, పాడుకుంటూ, ఎవరి పనులు వాళ్ళు చేసుకున్నారు.
ఆ ఇంటి వాతావరణాన్ని, ఆ ఇంట్లో వాళ్ళ ప్రశాంతతని చూసి ఆనందపడింది జాగృతి. 'ఇలాంటి ఇంట్లోకి రావాలని కదా అనుకున్నాను. నా కోరిక తీరింది. వీళ్ళ గురించి, అమ్మ చెప్పిందంతా నిజమే. ' అని మనసులోనే భగవంతుడికి ధన్యవాదాలు తెలుపుకుంది.
కానీ కాసేపట్లో, రాధ అరిచిన అరుపుతో, ఇంటి వాతావరణం మొత్తం మారిపోయింది. "నీళ్లు రావటం లేదు. వెళ్ళి మోటర్ వెయ్యి. " అని వంటింట్లోంచి అరుచుకుంటూ బయటి వచ్చింది రాధ.
అరుగుమీద పడకకుర్చీలో, ప్రశాంతంగా న్యూస్ పేపర్ చదువుతున్న మాణిక్యాలరావు తుళ్ళిపడి లేచి, పరిగెడుతూవెళ్ళి, మోటర్ వేసి వచ్చాడు. రాధ, మోటర్ వెయ్యమని సమర్థ్ కి చెప్పిందో, మాణిక్యాలరావుకి అర్ధంకాలేదు జాగృతికి.
రాధ, ఇంకా అరుస్తూనే ఉంది. "ఎంతసేపూ ఆ పేపర్ చదువుతూ కూర్చుంటాడు. ఎవరిని ఉద్దరించడానికో తెలియదు? ఇంతకీ ఏం చదువుతున్నావ్?" అంటూ మాణిక్యాలరావు చేతిలోనున్న పేపర్ ని లాక్కుని చూసింది రాధ. "అనుకున్నాను. ఇవే చూస్తూండుంటావ్. అందుకే నీకు వినపడలేదని. ఈ వయసులో, ఈ కోరికలేంటో. రేపటినుండి పేపర్ మాన్పించేస్తాను. తిక్క కుదురుతుంది." అని తలకొట్టుంది.
రాధ, మాణిక్యాలరావుని ఏకవచనంతో సంబోధించడం, ఆవిడ మాటతీరు, జాగృతిని ఆశ్చర్యానికి గురిచేశాయి. 'వేదాంత పండితుల కుటుంబం అన్నారు. మరి ఇలా మాట్లాడుతోందేమిటి ఈవిడ?' అనుకుంది.
ఏమీ పట్టనట్టు అన్నమయ్య పాటలు వింటున్న సమర్థ్ ని చూసి కోపం పెరిగిపోయింది రాధకి. "నా గురించి ఎవరికీ పట్టదు ఈ ఇంట్లో. ఈ మనిషితో ఇక ఉండలేను. తల పేలిపోతోంది. ఇక ఆ భక్తి ఛానల్ ఆపి, ఏదైనా సినిమా ఛానల్ పెట్టు. ఆ సినిమాలు చూస్తూ అయినా, నా బాధల్ని మర్చిపోతాను” అంది రాధ. సరేనంటూ, రాధ చెప్పినట్టు చేసాడు సమర్థ్.
ఫలహారం చేస్తూ, టీవిలో వస్తున్న సినిమా చూసారందరూ. రాధ పక్కనే వచ్చి కూర్చున్నాడు మాణిక్యాలరావు. సినిమా మొదలైన కాసేపటికి, దంపతులిద్దరూ, మాములుగా మాట్లాడుకున్నారు. సినిమా హీరోల గురించి, వాళ్ళ మధ్య చుట్టరికాలగురించి, హీరోలు వాళ్ళ కొడుకుల్ని సినిమాల్లోకి తీసుకురావడానికి ఎలా ప్రయత్నిస్తున్నారన్న విషయాల గురించి మాట్లాడుకున్నారు. 'కొంతసేపటి క్రితమే భర్త మీద అరిచినావిడ, ఇప్పుడు ఏమీ జరగనట్టు మామూలుగానే మాట్లాడుతోందే!!' అనుకుంది జాగృతి.
మధ్యాహ్నం భోజనాల సమయానికి, ఇంకో మొదలయ్యింది. సినిమా మొదలవడంతోనే, మళ్ళీ సినిమాల గురించి చర్చ కూడా మొదలయ్యింది. ఈ సారి, హీరోల హెయిర్ స్టైల్స్ గురించి, హీరోయిన్లు వేసుకునే పొట్టి బట్టల గురించి, హీరో, హీరోయిన్ మధ్య సంబంధాలు గురించి మాట్లాడుకున్నారు ఇద్దరూ.
మాణిక్యాలరావు మాటతీరు కూడా నచ్చలేదు జాగృతికి. 'ఇదేమిటి? ఏ అంశం గురించి అయినా, ఎలాంటి అభ్యన్తరం లేకుండా, మాట్లాడుకుంటున్నారే!! మావగారిది చదువుకున్నవాళ్ళ, ఉన్నతాధికారుల కుటుంబం అన్నారు అమ్మ. వీళ్ళ గురించి అమ్మ చెప్పింది నిజమేనా?' అన్న అనుమానం వచ్చింది.
జాగృతికి సినిమాలు చూడడం అలవాటులేదు. సినిమా గురించి ఏమీ తెలియదు. ఒకేరోజు రెండు సినిమాలు చూడడంవల్ల, సినిమాల ఆగకుండా చర్చలు జరుగుతుండడంవల్ల, తలనొప్పి మొదలయ్యి, కాసేపు విశ్రమిద్దామనుకుని, తన రూంలోకి వెళ్ళింది.
జాగృతి వెనకే, సమర్థ్ వచ్చాడు కోపంగా. వీళ్ళ మధ్య ఎదో జరగబోతోందన్న కుతూహలంతో, రాధ, మాణిక్యాలరావుని పిలిచి, రూం బయట నుంచుంది. లోపల జరుగుతున్న సంభాషణని విన్నారు ఇద్దరూ.
"నిన్న నువ్వు వచ్చినప్పటినుండి చూస్తున్నాను. ఎవరితోనూ మాట్లాడలేదు నువ్వు. అక్కడ అందరం సరదాగా మాట్లాడుకుంటుంటే, నువ్వు ఒక్కదానివి ఇక్కడికి వచ్చేసావ్. నీకు పెద్దవాళ్ళంటే గౌరవం లేదా? మా ఇల్లు, మేమూ నీకు నచ్చలేదా?" జాగృతిని అడిగాడు సమర్థ్.
"అయ్యో. అలాంటిది ఏమీ లేదు. నాకు సినిమాలు ఎక్కువగా చూసే అలవాటు లేదు. సినిమాల గురించి కూడా పెద్దగా ఏమీ తెలియదు. అందుకే, ఏమీ మాట్లాడలేకపోయాను. కొంచెం తలనొప్పిగా ఉంది. కాసేపు పడుకుంటాను. " అంది జాగృతి భయపడుతూ.
"సినిమాలు చూసే అలవాటు లేదా? ఏం?" అన్నాడు సమర్థ్ ఆశ్చర్యపోతూ.
"సినిమాలు చూస్తే, తలనొప్పి వచ్చేది చిన్నప్పటినుండి. " అంది జాగృతి.
"సినిమాలు చూస్తే, తలనొప్పి రావడం ఏమిటి? చోద్యం కాకపొతే? ఇలాంటిది దొరికింది ఏంటిరా నీకు? నీ బతుకులోని ఆనందాల్ని చంపెయ్యడానికి?" అంటూ తలుపుతోసుకుని లోపలకి వచ్చింది రాధ. మాణిక్యాలరావు కూడా రాధ వెనకనే వచ్చాడు. " డబ్బులు అయిపోతాయని చూసేవాళ్ళు కాదేమో. అయినా, ప్రతీవారం మనలా హాల్ కి వెళ్ళి, సినిమా చూసేంత డబ్బు, అదృష్టం అందరికీ ఉండదులే. " అంది గర్వంగా.
"మన ఇంటికి వచ్చాక, ఇక ఏ తలనొప్పి లేదు. అందరూ సినిమాలు చూడాల్సిందే. " అన్నాడు మాణిక్యాలరావు.
'సినిమాలు చూడకపోవడం తప్పన్నట్టు మాట్లాడుతుతున్నారేమిటి వీళ్ళు? సమర్థ్ బతుకులో ఆనందాల్ని చంపడానికి వచ్చానా? ఏమిటి ఇలా మాట్లాడుతున్నారు?' ఆశ్చర్యపోతూ, "మీరు ప్రతివారం సినిమా చూస్తారా?" అడిగింది జాగృతి.
"అవును. నువ్వు అస్సలు సినిమాలు చూడవా అయితే?" అడిగాడు సమర్థ్.
"మంచిసినిమా అయితే చూస్తాను. " అని చెప్పింది జాగృతి.
"మేమేమైనా చెడ్డ సినిమాలు చూస్తామా? మేము చూసేవీ మంచి సినిమాలే. " అంది రాధ మూతితిప్పుతూ.
"ఇంతకీ నువ్వు ఎలాంటివి చూస్తావ్?" అడిగాడు సమర్థ్.
"శంకరాభరణం, స్వాతిముత్యం, స్వర్ణకమలం.." అంది జాగృతి.
"అలాంటి సినిమాలు ఎవరు చూస్తారు ఈ కాలంలో? ఈవిడ అవతారాన్ని చూసి, ముసల్ది లాగ ఉంది అన్నాడు మీ నాన్న. ఇప్పుడు తెల్సుస్తోంది." అంది రాధ చిరాకు మొహంతో.
"కొత్తగా వచ్చిన సినిమాలేమి చూడలేదా అయితే?" అని అడిగాడు సమర్థ్.
జాగృతి, ఆ సంవత్సరం చూసిన అన్నమయ్య, శ్రీ మంజునాథ సినిమాల పేర్లు చెప్పింది.
"వీళ్ళు కూడా నాలాగ రాఘవేంద్రరావు ఫాన్స్ అన్నమాట" అని ఒక్కగెంతు గెంతాడు మాణిక్యాలరావు సంతోషంగా. "ఆయన సినిమాలలో పాటలు చాలా బాగుంటాయి" అన్నాడు.
"బాగుంటాయి. బాగుంటాయి. ఎందుకు బాగుండవు. పళ్ళు, పూలు, వచ్చి పడుతూంటే, నీలాంటివాళ్లకి చూడడానికి బాగుంటుంది మరి" అంది రాధ కోపంగా. రాధ, మాణిక్యాలరావుల సంభాషణ అర్ధంకాక, అయోమయంగా చూసింది జాగృతి.
"ఆయన తీసిన సినిమాల సీడీలు చాలా ఉన్నాయిరా మనింట్లో. ఎదోఒకటి పెట్టు. అందరం కలిసి, రాత్రిభోజనాలు చేస్తూ, చూద్దాం. " అన్నాడు మాణిక్యాలరావు, సమర్థ్ తో.
'మూడో సినిమానా! బాబోయ్!! నా వల్ల కాదు' అని తలపట్టుకుంది జాగృతి. ఒకొక్క సీడీ తీసి, పేర్లు చదివాడు సమర్థ్. 'వీళ్ళ దగ్గరున్న అన్ని సినిమాల పేర్లలోనూ ప్రియుడు అనే ఉందే!' అని ఆశ్చర్యపోయింది జాగృతి.
"ఎదో ఒకటి పెట్టు. అన్నీ మంచి సినిమాలే" అన్నాడు మాణిక్యాలరావు.
రాత్రి భోజనం సమయానికి, మొదలయ్యింది మూడో సినిమా. జాగృతి తలనొప్పితో బాధపడుతున్నా, చూడకపోతే ఏమంటారోనని, అందరితోపాటు కూర్చుంది. సినిమా మొదలవడంతోనే, చర్చ కూడా మొదలైంది. ఈ సారి డైరెక్టర్ గురించి. మొదటి సినిమా నుండి ఇప్పటివరకూ ఆయన తీసిన సినిమాలేమిటి? వాటిలో ఉన్న తేడా ఏమిటి? వయసుతోపాటు, డైరెక్టర్ ఎలా మారాయి? అన్న విషయాల గురించి మాట్లాడుకున్నారు రాధ, మాణిక్యాలరావు.
మాణిక్యాలరావు, పాటలు వచ్చినప్పుడు మాట్లాడకుండా, పూర్తిగా పాటలో లీనమైపోయాడు. మాణిక్యాలరావుని చూసి, రాధకి ఒళ్ళు మండిపోయింది. "నోట్లోంచి చొంగ కారుతోంది. తుడుచుకో" అంది మాణిక్యాలరావుతో, కోపంగా.
అప్పటికి అర్ధమయ్యింది జాగృతికి, ఆ ఇంటి పరిస్థితి, ఆ ఇంటి సభ్యుల పాండిత్యం. మోసపోయిన భావన కలిగింది జాగృతికి. తలనొప్పి విపరీతంగా పెరిగి, తన రూంలోకి వెళ్ళిపోయింది.
ఎదో జరిగిందని తెలుసుకుని, రాధ కూడా రూంలోకి వచ్చింది. జాగృతి వాంతు చేసుకోవడం చూసిన రాధ, "ఒరేయ్ మనం మోసపోయాంరా. అత్తగారింటికి వచ్చిన రెండో రోజే వాంతులు చేసుకుంటోందేమిటిరా ఇది. పిల్ల నీకు నచ్చిందని అన్నవని పెళ్ళి చేసాం. ఇప్పుడు చూడు ఏమయ్యిందో" ఏడుస్తూ, అరుస్తూ సమర్థ్ ని పిలిచింది రాధ.
రాధ మాటలని, తట్టుకోలేకపోయింది జాగృతి. కళ్ళలో నీళ్ళు ఆగలేదు జాగృతికి. సమర్థ్ కూడా రాధ మాటలని విని ఆశ్చర్యపోయాడు. "నేను చూస్తాను. నువ్వు వెళ్ళి, సినిమా చూడు" అని రాధని బయటకి పంపి, జాగృతి దగ్గరగా తీసుకున్నాడు.
"సారీ జాగృతి, మా అమ్మ తరపున నేను నీకు సారీ చెప్తున్నాను. నీకు ఇంతలా ప్రాబ్లెమ్ ఉందని నాకు తెలియదు. ఇంకెప్పుడూ ఇలా జరగదు. సరేనా" అంటూ జాగృతి కళ్ళనీళ్ళు తుడిచాడు.
మూడో సినిమా అయ్యాయేటప్పటికీ రాత్రి 12 అయ్యింది. పడుకోవడానికి వెళుతూ, సమర్థ్ వాళ్ళ రూమ్ లోకి వచ్చాడు మాణిక్యాలరావు. "సమర్థ్, రేపు ఒక కొత్త సినిమా రిలీజ్ అవుతోందిరా. ఫస్ట్ డే, మార్నింగ్ షో కి వెళ్ళాలి. తొందరగా లేచి, రెడీగా అవ్వండి అందరూ. ఆడవాళ్ళ లైన్ లో, మీ అమ్మని, మీ ఆవిడని నించోబెడితే, టిక్కెట్లు తొందరగా దొరుకుతాయి" అన్నాడు సమర్థ్ తో.
"నువ్వు, అమ్మా వెళ్ళండి నాన్నా. మేము రాము" అని చెప్పాడు సమర్థ్ చిరాకుగా.
"పెళ్ళాం, బెల్లం అయిపొయింది అప్పుడే" అంది రాధ.
మర్నాడు, సుప్రభాతం వింటూ, ముగ్గులువేసుకుంటూ, పేపర్ చదువుకుంటూ మొదలయ్యింది రోజు. రాధ, మాణిక్యాలరావు చక్కగా తయారయ్యి, మార్నింగ్ షోకి వెళ్ళాక, లత నుండి జాగృతికి ఫోన్ వచ్చింది.
"ఎలా ఉన్నావ్? మీ అత్తగారి దగ్గర, మావగారి దగ్గర మంచి పద్ధతులు, అలవాట్లు నేర్చుకుంటున్నావా?" అంటూ లత నుండి ఫోన్ వచ్చింది జాగృతికి.
" హ్మ్మ్. మంచి పద్ధతులు. నేను నేర్చుకోను. నేర్చుకోవాలని లేదు" అని ఫోన్ పెట్టేసింది జాగృతి.
మళ్ళీ ఫోన్ చేసింది లత. "ఏం జరిగింది అమ్మా? అక్కడవాళ్ళు నిన్ను బాగానే చేసుకుంటున్నారా?" ఆతృతగా అడిగింది లత.
"చాలా బాగా చూసుకుంటున్నారు. ఎందుకు చేసుకోరూ. వేదాంత పండితులు, ఉన్నతాధికారుల ఇంటికి పంపారు కదా" అంది జాగృతి కోపంగా.
"ఏమ్మయ్యిందమ్మా. ఎప్పుడూ లేనిది ఇలా తిక్కతిక్కగా మాట్లాడుతున్నావ్?" అడిగింది లత.
"ఏం చెప్పను అమ్మా. వీళ్ళకి విపరీతమైన సినిమాల పిచ్చి. పూటకో సినిమా చూస్తున్నారు. వాటి గురించే చరించుకున్నారు. నాకు విపరీతమైన తలనొప్పి వచ్చింది. అయినా బలవంతంగా చూడాల్సివచ్చింది" అంది జాగృతి.
"కొంతమందికి అలా సినిమాల పిచ్చి ఉంటుంది. అందులో తప్పేముంది? ప్రతిదాని అలా బూతద్దంలో చూడకూడదు" అని నచ్చచెప్పడానికి ప్రయత్నించింది లత.
"అత్తగారి కుటుంబం వేదాంత పండితుల కుటుంబం అన్నారు. ఆవిడ మాటతీరు చూస్తే అలా లేదు. మావగారిది ఉన్నతాధికారుల కుటుంబం అన్నారు. సినిమా పాటల్ని, న్యూస్పేపర్ లోని సినిమా సెక్షన్లని కళ్ళార్పకుండా చూస్తున్నారు. అన్ని కనుక్కునే నాకు ఈ పెళ్ళి చేసారా?" అని అడిగింది జాగృతి.
జాగృతి బాధ అర్ధమయ్యింది లతకి. "వాళ్ళు అలాగే చెప్పారు. వాళ్ళ చుట్టాలందరూ వాళ్ళు చెప్పినట్టుగానే మంచివాళ్ళే. కానీ, వీళ్ళు ఇలాంటివాళ్ళని అస్సలు తెలియలేదు. అబ్బాయి సరిగ్గా ఉంటే, అదే చాలు" అంది లత.
"సమర్థ్ మంచివాళ్ళలానే అనిపిస్తున్నారు. సినిమాల గురించి ఆయన ఏమీ మాట్లాడలేదు." అంది జాగృతి.
"అత్తగారు, మావగారు విషయంలో అనుకున్నది ఒకటి, అయినది ఒకటి అయ్యింది. పోనిలే. అల్లుడుగారు మంచివాళ్ళే కదా. కనీసం విషయంలోనైనా అనుకున్నది, అనుకున్నట్టుగానే ఉండేటట్టు చూడమని దేవుణ్ణి కోరుకుందాం." అంది లత.
సమర్థ్, జాగృతి, పెళ్ళికి తీసుకున్న సెలవులు అయిపోయాక, వాళ్ళు ఉద్యోగాలు చేస్తున్న ఊరిలో, ఇల్లు తీసుకుని కొత్తకాపురం పెట్టారు. అత్తగారు, మావగారు తమతో కలిసి ఉండనందుకు ఆనందపడింది జాగృతి.
***
L. V. జయ గారి ప్రొఫైల్ కొరకు, మనతెలుగుకథలు.కామ్ లో వారి ఇతర రచనల కొరకు
ఉగాది 2025 కథల పోటీల వివరాల కోసం
మేము నిర్వహించే వివిధ పోటీలలో రచయితలకు బహుమతులు అందించడంలో భాగస్వాములు కావాలనుకునే వారు వివరాల కోసం story@manatelugukathalu.com కి మెయిల్ చెయ్యండి.
మాకు రచనలు పంపాలనుకుంటే మా వెబ్ సైట్ లో ఉన్న అప్లోడ్ లింక్ ద్వారా మీ రచనలను పంపవచ్చు. లేదా story@manatelugukathalu.com కు text document/odt/docx రూపంలో మెయిల్ చెయ్యవచ్చు.
మనతెలుగుకథలు.కామ్ వారి యూ ట్యూబ్ ఛానల్ ను ఈ క్రింది లింక్ ద్వారా చేరుకోవచ్చును.
దయ చేసి సబ్స్క్రయిబ్ చెయ్యండి ( పూర్తిగా ఉచితం ).
మనతెలుగుకథలు.కామ్ వారి ఫేస్ బుక్ పేజీ చేరడానికి ఈ క్రింది లింక్ క్లిక్ చేయండి. లైక్ చేసి, సబ్స్క్రయిబ్ చెయ్యండి.
గమనిక : పాఠకులు తమ అభిప్రాయాలను మనతెలుగుకథలు.కామ్ వారి అఫీషియల్ వాట్స్ అప్ నెంబర్ : 63099 58851 కు పంపవచ్చును.
రచయిత్రి పరిచయం : LV జయ
నా పేరు LV జయ.
https://www.manatelugukathalu.com/profile/jaya
నాకు చిన్నప్పటి నుండి తెలుగు కథలు, పద్యాలూ, సాహిత్యం, సంగీతం అంటే చాలా ఇష్టం.
ఏ విషయాన్ని అయినా సరదాగా తీసుకునే అలవాటు. అదే నా కథల రూపంలో చూపించాలని చిన్న ప్రయత్నం చేస్తున్నాను. మీరు ఆదరిస్తారని కోరుకుంటున్నాను.
ధన్యవాదాలు
Comments