#MKKumar, #ఎంకెకుమార్, #Chakram, #చక్రం, #TeluguStories, #TeluguKathalu, #తెలుగుకథలు
Chakram - New Telugu Story Written By - M K Kumar
Published In manatelugukathalu.com On 11/12/2024
చక్రం - తెలుగు కథ
రచన: ఎం. కె. కుమార్
1979వ సంవత్సరం, ఆంధ్ర విశ్వవిద్యాలయం ప్రాంగణం, వైజాగ్.
విద్యార్థులు తమ పనుల్లో నిమగ్నమై ఉన్నారు. అసెంబ్లీ హాలు సమీపంలో ప్రసాద్, అనురాధశ్రీ నడుచుకుంటూ పరిశోధన అంశంపై చర్చించుకుంటున్నారు.
విద్యార్థుల కోలాహలం విశ్వవిద్యాలయం ప్రాంగణం నిండా ఉరకలెత్తుతోంది. గాలి స్వచ్ఛమైన తాజాదనంతో నిండినప్పటికీ, కాలేజీ కాఫీ కేఫ్ నుంచి పొంగుతున్న కాఫీ వాసన కొంతమంది గుంపుల దగ్గర కలసిపోతోంది. తరగతుల బెల్ మ్రోగగానే విద్యార్థులు జతజతలుగా బయటకు వస్తున్నారు.
ఆ వాతావరణంలో జోష్ నిండిన యువతీ యువకుల చర్చలు, నవ్వులు అక్కడ ఉల్లాసభరితమైన శబ్దం కలుగజేస్తున్నాయి.
అసెంబ్లీ హాలుకు దగ్గరగా పెద్ద చెట్ల నీడలో తడిసిపోతోన్న ఫుట్‌పాత్ వుంది. కారుతున్న కుళాయి ఫుట్‌పాత్ కి నిరంతర స్నానం చేయిస్తోంది. పక్కనే చిన్నచిన్న మొక్కలు ఆ ప్రాంతానికి ప్రకృతి అందాలను చేకూరుస్తున్నాయి. రోడ్డు వెంటగా కొన్ని జీపులు, బైకులు హడావిడిగా వెళ్తున్నాయి. ఈ రణగొణ ద్వనుల మధ్య రోడ్డు ప్రశాంతంగా కనిపిస్తోంది.
ప్రసాద్: (చినుకులా నవ్వుతూ) అనురాధా, నీ వాదనకు నేను ఒప్పుకోను. ఆ జీవకణాల్లో ప్రోటీన్ విభజన, మామూలు రసాయనిక చర్యలా ఉంటుంది.
అనురాధశ్రీ: (ఆహ్లాదంగా నవ్వుతూ) అదేం కాదు, ప్రసాద్ నా పరిశోధన ఫలితాల ప్రకారం, ఇది సాధారణ విభజన కాదని స్పష్టమైంది. ప్రత్యేక ఎంజైమ్ చర్యల వల్లే జరుగుతుంది.
ప్రసాద్: (మళ్ళీ నవ్వుతూ ) ఓహ్, మరి ఆ ఎంజైమ్ల ప్రభావం గురించి నువ్వు చెప్పిన లెక్కలు సరిపోవట్లేదేమిటి?
అనురాధశ్రీ: (చేతులెత్తి చర్చిస్తూనే) లెక్కల మాట నువ్వే చెక్ చేయవచ్చు. కానీ నిజానికి..
ఇంతలో ఒక బస్సు రోడ్డులో వేగంగా మలుపు తిరుగుతూ వచ్చింది. ప్రసాద్ అజాగ్రత్తగా రోడ్డుపైకి అడుగు వేస్తున్నాడు.
అనురాధశ్రీ: (అందోళనగా) ప్రసాద్, ఆగు, రోడ్డుకు దూరంగా వెళ్ళు.
ప్రసాద్ వెనక్కి చూడగానే బస్సు వేగంగా దూసుకువచ్చి వారిని ఢీకొట్టింది. ఇద్దరూ బస్సు చక్రాల కింద నలిగి పోయారు. చుట్టూ ఉన్న విద్యార్థులు, సిబ్బంది కంగారుగా ఆ స్థలానికి పరుగెత్తు కొచ్చారు.
ప్రసాద్, అనురాధశ్రీ ఇద్దరినీ బస్సు వేగంగా ఢీ కొట్టడం వల్ల ఆ స్థలం మళ్ళీ నిశ్శబ్దంగా మారింది. బస్సు ఆగిపోయింది, డ్రైవర్ భయంతో కాలు చాపి దిగాడు. చుట్టూ జనం గుంపు చేరారు. విద్యార్థులు, సిబ్బంది, రోడ్డుపక్కన ఉన్న వారు భయంతో, కంగారుతో ఆ దృశ్యాన్ని చూశారు.
స్కార్ఫ్, పుస్తకాల వంటి వస్తువులు రోడ్డుపైన విసిరిపడ్డాయి. రక్తం రోడ్డుపై చెరగలేని ముద్రలా మారింది. సమీపంలో ఉన్న కొందరు ఫోన్ చేసి అంబులెన్స్‌కు సమాచారం ఇచ్చారు, మరికొందరు పోలీసులను సంప్రదించారు.
ప్రసాద్, అనురాధశ్రీ శరీరాలు నిర్జీవంగా చక్రాల కింద నలిగిపోయి ఉన్నాయి. వారి ముఖాలపై చివరి క్షణాల భయానకత స్పష్టంగా కనిపించింది.
వైద్య సిబ్బంది అక్కడకు చేరుకున్నా, తక్షణంగా వారు చనిపోయినట్టు ధృవీకరించారు. వారి జీవితంలోని చివరి క్షణాలు, వారి చర్చల ఉత్సాహం, నవ్వులు అంతా ఒక విషాదకర అనివార్యతలో నిమిషాల్లో జరిగిపోయింది.
విద్యార్థి 1: (దుఃఖభరితంగా) ఏమిటి ఇది, బస్సు ఇలా వేగంగా రావడం ఏమిటి?
విద్యార్థి 2: (కన్నీరు పట్టలేక) ప్రసాద్, అనురాధ.. వాళ్లిద్దరూ.. అయ్యో ఏం జరిగిపోయింది?
స్థలం విషాదభరిత వాతావరణంతో నిండిపోయింది. విద్యార్థులు కొందరు గొంతులు పెగలుతూ బస్ సిబ్బందిని తిడుతున్నారు. మరికొందరు కన్నీళ్లు తుడుచుకుంటున్నారు. మిత్రులు, స్నేహితులు శోకసంద్రంలో మునిగిపోయారు.
అసెంబ్లీ హాలులో విద్యార్థులు, అధ్యాపకులు, సిబ్బంది అంతా చేరుకున్నారు. ఆ వాతావరణం విషాదభరితంగా, కానీ కోపంతో నిండివుంది.
విద్యార్థి నాయకుడు:
(గొంతు ధైర్యంగా, కానీ బాధతో)
"ప్రసాద్, అనురాధా.. వాళ్ల ప్రాణాలు ఇలా బలవ్వాలి అని ఏనాడైనా ఊహించామా? మనం ఈ ప్రమాదాన్ని కేవలం ఒక ఆక్సిడెంట్ గా మరచిపోతామా?"
విద్యార్థి 1:
(ఆగ్రహంతో)
"ఇంకా ఎంతమంది ప్రాణాలు బస్సు చక్రాల కింద నలిగిపోవాలి? ప్రభుత్వానికి మా ప్రాణాలంటే విలువలేదా?"
విద్యార్థి 2:
"ఈ ప్రైవేటు బస్సుల దూకుడు ఎందుకు? మనం బాధితులుగా మిగిలి ఉండటానికేనా?"
విద్యార్థి నాయకుడు:
(చేతిని పైకి ఎత్తుతూ)
"ఇది కేవలం వారి కుటుంబాలకు విషాదం కాదు. ఇది మనందరి కళ్లెదుట జరిగిన అన్యాయం. ప్రైవేటు బస్సుల నిర్లక్ష్యానికి ఎంతమంది యువజీవితాలు బలికావాలి? ఈ సంఘటనకు తక్షణమే న్యాయం జరగాలి"
విద్యార్థుల గుంపు: (పెద్దగా నినాదాలు చేస్తూ)
"బస్సు నిర్లక్ష్యానికి బాధ్యులు ఎవరు?"
"ప్రైవేటు బస్సులు రద్దు చేయాలి"
"విద్యార్థుల రక్తానికి న్యాయం కావాలి"
కొంతమంది ఆగ్రహంతో నడుచుకుంటూ, ఢీ కొట్టిన బస్సుపై రాళ్లు విసిరారు. కొందరు ఆ బస్సును తగులబెట్టడం మొదలు పెట్టారు. బస్ సిబ్బంది ని తీవ్రంగా కొట్టారు.
అధ్యాపకులు:
( నిలబడి, ఆందోళనతో)
"విద్యార్థులారా, ఆగండి. ఇలాగే అన్నీ ధ్వంసం చేస్తే సమస్యకు పరిష్కారం జరగదు. "
విద్యార్థి నాయకుడు:
(కోపంగా)
"ఇది ధ్వంసం కాదు, ఎదురు తిరిగిన నిరసన. మా ప్రాణాలకు విలువ లేదని చెబితే, మా విలువను చూపించే పద్దతి ఇదే"
ఆంధ్రా యూనివర్సిటీ అసెంబ్లీ హాలులో గాఢమైన నిశ్శబ్దం అలుముకుంది. ప్రసాద్, అనురాధశ్రీ చిత్రాలు గోపురాన్ని అలంకరించినట్లు మధ్యలో ఉంచబడ్డాయి. పక్కనే వడలిన గులాబీలు, మగ్గిన దీపాలు ఆ స్థలాన్ని మరింత విషాదభరితం చేస్తున్నాయి. విద్యార్థులు తమ గుండెలో బాధను ఆపలేక నీరసమైన ముఖాలతో నిలబడిపోయారు. హాలులో గాలి కూడా వెనుకంజ వేస్తున్నట్లు అనిపిస్తోంది.
పైనుంచి వేలాడుతున్న పసుపు మసక లైట్లు హాలును మరింత బాధతో నింపుతున్నాయి. విద్యార్థుల కళ్ళల్లో తడిగా కనిపిస్తున్న ఆగ్రహం, వాళ్ల ముఖాల్లో నిబద్ధతను ప్రతిఫలిస్స్తోంది. కొందరు తమ చేతులు గట్టిగా ముడుచుకొని, మరికొందరు కింద పడిపోతున్న కన్నీటిని తుడుచుకుంటూ ఉన్నారు.
హాలులో ఒక్కసారిగా విద్యార్థి నాయకుని గళం మార్మోగింది. ఆ గళం వేడి మంటలా విద్యార్థులందరి మనసులను రగిలించింది. “న్యాయం కావాలి!” అన్న ప్రతి పదం గుండెకు పల్లివి లాగా మోసింది. కొంతమంది గట్టిగా అరిచారు, కొందరు చేతులెత్తి నిరసన వ్యక్తం చేశారు.
అసెంబ్లీ హాలు బయట రోడ్డు దిశగా విద్యార్థుల గుంపు పరుగెత్తడం మొదలైంది. ఆ ప్రాంతం మొత్తం వేడి సెగలతో నిండిపోయింది. రోడ్డు వెంట నిలబడ్డ ప్రైవేటు బస్సులు విద్యార్థుల ఆగ్రహానికి కేంద్రబిందువులుగా మారాయి. కొన్ని బస్సులపై రాళ్లు వర్షంలా పడుతుంటే, మరికొన్ని మంటల కొవ్వొత్తుల్లా మండిపోతున్నాయి. గాలి కమ్మదనాన్ని కోల్పోయి వేడిగా, జ్వాలగా మారిపోయింది.
అధ్యాపకులు, సిబ్బంది నిరసనను ఆపేందుకు ప్రయత్నిస్తున్నా, వారి మాటలు నిరసన కేకలతో తేలిపోయాయి. అధికారుల హడావుడి, పోలీసు సైరన్లు ఆ దృశ్యాన్ని మరింత ఉద్రిక్తంగా మార్చాయి. రోడ్డంతా కల్లోలం, నిరసన, కన్నీరు, మంటలతో నిండిపోయింది.
ఈ సంఘటన ప్రతీ ఒక్కరిలో ఒక ఆవేదన కలిగించింది. అక్కడి గాలి, దుమ్ము, రోడ్డు అన్నీ ఆ బాధను గ్రహించినట్లుగా, కష్టమైన స్పందనను వ్యాపింపచేస్తున్నాయి. విద్యార్థుల గుండెల్లో కోపం కూడా ఉధృతంగా ఉరకలెత్తుతోంది. వారి నినాదాల ప్రభావం విశ్వవిద్యాలయ గోడలను దాటుతూ, సముద్రం వరకు వ్యాపించింది.
రహదారులు నిండుగా విద్యార్థులు నినాదాలు చేస్తూ నిరసన చేస్తూ నిలబడుతున్నారు. ప్రైవేటు బస్సులు అన్నీ నిలిచిపోయాయి. నగరం చుట్టూ రోడ్లు పూర్తిగా దిగ్బంధం అయ్యాయి. రద్దీ రోడ్లపై విద్యార్థుల నినాదాలు మార్మోగుతున్నాయి.
నిరసన ఇంకా ఉధృతం అయింది. విద్యార్థులు ఆందోళనతో కూడిన ఆగ్రహంతో ప్రభుత్వానికి తమ స్వరాన్ని వినిపించే ప్రయత్నం చేస్తున్నారు. విశాఖపట్నం మొత్తం అట్టుడికి పోయింది. పదికి పైగా ప్రైవేట్ బస్సులు ధ్వసం చేయబడ్డాయి.
విద్యార్థి నాయకుడు:
(గుంపు మధ్యన నిలబడి)
"మనం బాధితులుగా మిగిలి ఉండటానికి సిద్ధం కాదు. అన్యాయాన్ని క్షమించం. ప్రైవేటు బస్సుల యజమాన్య నిర్లక్ష్యం నశించాలి? ప్రజల ప్రాణాలు విలువ ఇవ్వరా? ఈ ఉద్యమం న్యాయం సాధించే వరకూ ఆగదు"
విద్యార్థి గుంపు:
"న్యాయం కావాలి. ప్రైవేటు బస్సులు రద్దు చేయాలి. ప్రసాద్, అనురాధకు న్యాయం చేయాలి"
గుంపు రోడ్డుపై బైఠాయించి నినాదాలు చేస్తోంది. చుట్టూ రోడ్డు పక్కన నిలిచిన ప్రజలు ఈ ఘటనను ఉత్సాహంగా చూస్తున్నారు. కొందరు గుంపులో చేరుతున్నారు.
పెద్ద వయస్సు వ్యక్తి:
(విద్యార్థుల వైపు చూస్తూ)
"మీ బాధను మేము అర్థం చేసుకుంటున్నాం. అన్యాయం పట్ల మీరు చేస్తున్న ఈ పోరాటం సరియైనది. మా మద్దతు మీకుంటుంది"
యువ రైతు:
"ప్రైవేటు బస్సుల దాష్టికం ఇంకా ఎంత కాలం? ప్రభుత్వానికి ఇదే సూటిగా చెప్పే సమయం. మీరు మా భవిష్యత్‌కి న్యాయం చేయండి"
ఓ అమ్మాయి:
(నిరసనలో విద్యార్థులతో చేరి)
"ఇది కేవలం విద్యార్థుల పోరాటం కాదు. ఇది ప్రతి మనిషి ప్రాణానికి విలువ చెప్పే పోరాటం. మేము మీతో కలిసి పోరాడతాం. "
విద్యార్థి నాయకుడు:
(గట్టిగా)
"ఇది కేవలం ఇక్కడితో ముగియదు. ఈ ఉద్యమం విశాఖ నగరానికే కాదు, ఆంధ్రప్రదేశ్ మొత్తానికి పాకుతుంది"
విద్యార్థుల ఆందోళన ఇంకా వేగం పెరుగింది. పక్కనే నిలబడ్డ పౌరులు విద్యార్థులకు నీళ్లు అందిస్తున్నారు. వృద్ధులు వాళ్లతో పాటు నిరసన లో పాల్గొన్నారు. పోలీసులు రంగప్రవేశం చేసే ప్రయత్నం చేసినప్పటికీ, జనాల్లోని ఐక్యత వారిని వెనక్కి తగ్గించింది.
విద్యార్థి గుంపు:
"ప్రైవేటు బస్సులను నిలిపివేయండి. న్యాయాన్ని కాపాడండి. ప్రజల ప్రయాణానికి భద్రత ఉండాలి"
రోడ్లన్నీ నిరసనలతో నిండిపోవడం, రగిలిన ప్రజాస్వరం ప్రభుత్వానికి స్పష్టమైన సందేశం ఇచ్చింది.
శాసనసభ హాల్ నిండుగా సభ్యులు ఉన్నారు. ప్రతిపక్ష నాయకులు దృఢంగా నిలబడి నిరసన వ్యక్తం చేస్తున్నారు. సభ అధ్యక్షుడు కఠిన స్వరంతో మైక్ ద్వారా సభ్యులను ప్రశాంతంగా ఉండమని ఆదేశిస్తున్నా, వాళ్ళు పట్టించు కోవడం లేదు.
గౌతు లచ్చన్న:
(స్వరం కఠినంగా, కానీ భావోద్వేగంతో)
"గౌరవనీయ సభ్యులారా, విశాఖపట్నంలో జరిగిన ఆ ఘోర ప్రమాదం ఒక యాదృచ్ఛిక సంఘటన కాదు. అది ప్రైవేటు బస్సుల నిర్లక్ష్యం. ఆ ప్రణాళికలేని రవాణా వ్యవస్థ వల్ల ప్రజల ప్రాణాలు పోతున్నాయి. ప్రసాద్, అనురాధశ్రీల ప్రాణాలు ఎలా వెనక్కు వస్తాయి? దీనిపై సమాధానం చెప్పండి”
ప్రతిపక్ష నాయకుల నుండి 'సరైన జవాబివ్వండి' అంటూ నినాదాలు వినిపించాయి
డా. చెన్నారెడ్డి (ముఖ్యమంత్రి):
(లేచి నిలబడి)
"లచ్చన్నగారు, మీ ఆవేదనను అర్థం చేసుకుంటున్నాను. ప్రభుత్వం ఈ విషయంలో నిర్లక్ష్యం చేయలేదు. బాధితుల కుటుంబాలకు న్యాయం చేయడానికి అన్ని చర్యలూ తీసుకుంటున్నాం. "
గౌతు లచ్చన్న:
(అపహాస్యంతో)
"అంతేనా సార్? పుష్పగుచ్ఛాలు పంపితే సమస్య పరిష్కారమవుతుందా? రాష్ట్ర ప్రజలు ఇప్పుడు ఆ బస్సులపై విశ్వాసం కోల్పోయారు. ప్రైవేటు బస్సులను కొనసాగించడం అంటే మరింత ప్రాణనష్టాన్ని ఆహ్వానించడమే"
ప్రతిపక్ష నాయకులు:
"ప్రైవేటు బస్సులను రద్దు చేయాలి"
"ప్రజల ప్రాణాలకు విలువ ఇవ్వాలి!"
డా. చెన్నారెడ్డి:
(ఒత్తిడితో, గంభీరంగా)
"ఈ ఘటన రాష్ట్ర ప్రజలను తీవ్రంగా కలచివేసిన విషయం నాకు తెలుసు. విద్యార్థుల ఆందోళనలు, ప్రజల నిరసనలు మాకు స్పష్టమైన సంకేతం పంపాయి. ప్రభుత్వంగా, మా బాధ్యతను తప్పించుకోం. దశలవారీగా ప్రైవేటు బస్సు సేవలను రద్దు చేసి, రాష్ట్ర ఆర్టీసీ ఆధీనంలో రవాణాను తీసుకురావడానికి హామీ ఇస్తున్నాను. "
గౌతు లచ్చన్న:
(చేయి పైకి ఎత్తి)
"మంచి నిర్ణయం తీసుకున్నారు, కానీ దశలవారీ అన్న మాట సరిపోదు. ఈ ప్రక్రియకు స్పష్టమైన కాలపట్టిక ప్రకటించాలి. రాష్ట్ర ప్రజలు మీ మాటలతోనే సరిపెట్టుకోరు. కార్యాచరణ చూడాలనుకుంటున్నారు. "
ప్రతిపక్ష నాయకులు:
"సరైన చర్యలు తక్షణమే తీసుకోండి"
సభాధ్యక్షుడు:
(గంభీరంగా)
"సభ నిశ్శబ్దంగా ఉండాలి. ముఖ్యమంత్రి గారు, ఈ అంశంపై మరింత వివరాలు ఇచ్చి సభ్యుల సందేహాలను నివృత్తి చేయండి. "
డా. చెన్నారెడ్డి:
(స్వరం మృదువుగా, కానీ నిశ్చయంగా)
"ప్రైవేటు బస్సుల నిర్వహణ వ్యవస్థపై కఠినమైన నియంత్రణలు అమలు చేస్తాం. ప్రభుత్వ ఆధీనంలోని బస్సులను ప్రాధాన్యంగా తీసుకొస్తాం. మా ప్రభుత్వం ప్రజల భద్రతకు నిబద్ధంగా పనిచేస్తుంది. ఇది నా హామీ. "
సభలో మిశ్రమంగా మద్దతు, విమర్శలు వ్యక్తం అయ్యాయి. ప్రభుత్వం ఆ ఒత్తిడిలో సరైన చర్యలు తీసుకోవాలని నిర్ణయానికి వస్తుంది.
మే 1979, ఏయూ ప్రాంగణం
స్మృతి చిహ్నం ఆవిష్కరణ
ఏయూ ప్రాంగణంలో, అసెంబ్లీ హాల్ సమీపంలో, ప్రసాద్, అనురాధశ్రీల స్మారకార్ధం స్మృతి చిహ్నాన్ని ఆవిష్కరించేందుకు ఏర్పాట్లు చేస్తున్నారు. సమకూర్చిన బడ్జెట్‌తో రూపొందించిన స్మృతి చిహ్నం విద్యార్థుల మధ్య ఆవిష్కరణ కోసం ఉంచబడింది. విద్యార్థులు, అధ్యాపకులు, సిబ్బంది అందరూ ఉత్సుకతతో నిలబడి ఉన్నారు.
విద్యార్థి నాయకుడు:
(చింతనతో, గంభీరంగా)
"ఈ రోజు మనందరికీ అత్యంత ఆవేదనకరమైన రోజు. మన సహచరులు, ప్రసాద్, అనురాధశ్రీ మరణం మనం ఎప్పటికీ మర్చిపోరాదని స్మరించుకుంటూ ఈ స్మృతి చిహ్నాన్ని ఆవిష్కరిస్తున్నాం. వారి త్యాగం, వారి ఆశయాల కోసం నిలబడిన ఈ స్మారకాన్ని ఎప్పటికీ గుర్తుంచుకుంటాము. "
విద్యార్థులు, అధ్యాపకులు పక్కన నిలబడి ఉన్న స్మృతి చిహ్నాన్ని ఆవిష్కరించారు. అది, నిటారుగా నిలబడి ఉన్న సిలిండర్ రూపంలో ఉంది. దాని మీద "ప్రసాద్, అనురాధశ్రీ - వారి త్యాగానికి స్మరణ" అని చెక్కబడింది.
విద్యార్థి నాయకుడు:
(పూర్వపు విద్యార్థులకు)
"ఇప్పుడు మనం మౌన ప్రణామం చేసి, వారి త్యాగాలను స్మరించుకుందాం. "
విద్యార్థులు, అధ్యాపకులు అందరూ స్మృతి చిహ్నం ముందు మౌనంగా నిలబడి, ప్రైవేట్ బస్సులు రద్దు చేయాలని ప్రణామం చేశారు. అన్ని ముఖాలు బాధతో నిండాయి. మౌనంగా, వారి కోసం కొందరు చిన్నపాటి ప్రార్థన కూడా చేశారు.
పెద్ద వయస్సు ఉన్న అధ్యాపకుడు:
(విద్యార్థి నాయకుడికి దగ్గరగా వస్తూ, నిశ్శబ్దంగా)
"మీరు ఎంతో మంచి పని చేశారు. ఈ స్మృతి చిహ్నం వారి త్యాగాన్ని ఎప్పటికీ మనసులో ఉంచుకోవడానికి, తదుపరి తరాలకు ఈ విషయం చేరవేస్తుంది. "
విద్యార్థి నాయకుడు:
(ఆలోచనతో)
"మనం, మన సమాజం నిజంగా మారాలి. వారు ఇచ్చిన పాఠాలు, వారి ప్రేరణ ఇప్పటికీ మన జీవితాలలో మార్గదర్శకంగా ఉంటాయి. "
1983 - ఎన్టీఆర్ ప్రభుత్వం నిర్ణయం
బస్సుల జాతీయకరణ
రాష్ట్రభవన్‌లో, ఎన్టీఆర్ (నందమూరి తారక రామారావు) ముఖ్యమంత్రిగా తన కార్యాలయంలో ఆలోచన చేసుకున్నారు. ఆర్టీసీ అధికారులతో సమావేశం జరుగుతోందిమ్ సాహసిక నిర్ణయాలు తీసుకోవడానికి ప్రభుత్వ పెద్దలు సిద్ధం అవుతున్నారు. ఎన్టీఆర్ సమక్షంలో, RTC సిబ్బంది, మంత్రి వర్గం, పౌరసేవా అధికారులు హాజరయ్యారు.
ఎన్టీఆర్ (ముఖ్యమంత్రి):
(చిరునవ్వుతో, కఠిన నిర్ణయం తీసుకుంటూ)
"ఈ రాజ్యానికి ప్రజల ప్రాణాల కంటే ముఖ్యమైనది మరొకటి లేదు. ప్రైవేటు బస్సుల వల్ల ఎన్నో ఘోర సంఘటనలు జరిగాయి. ముఖ్యంగా విశాఖపట్నం ఘటనను మనం మర్చిపోలేము. ఇప్పుడు మనం నిర్ణయం తీసుకోవాలి. ప్రైవేటు బస్సులన్ని రద్దు చేస్తూ, రాష్ట్ర ఆర్టీసీ ద్వారా ప్రజలకు సురక్షితమైన రవాణా సేవలను అందించాలి. "
RTC అధికారి:
"ముఖ్యమంత్రి గారు, ఈ నిర్ణయం ప్రకారం అన్ని ప్రైవేటు బస్సులను రద్దు చేస్తే, ఆర్ టి సి పట్ల ప్రజల అభిప్రాయం మెరుగ్గా ఉంటుంది. ప్రజల భద్రతే మన ప్రధాన కర్తవ్యం. "
పత్రికల దృష్టిని ఆకర్షించేలా, ప్రభుత్వ అధికారులతో మీటింగ్ తరువాత ఎన్టీఆర్ అధికారిక ప్రకటన జారీ చేశారు. రవాణా నిబంధనలు ఖచ్చితంగా అమలు చేయాలని అధికారికంగా చెప్పడం జరిగింది.
RTC అధికారులు:
"ప్రతి గ్రామానికి, ప్రతి పట్టణానికి, ప్రతి నగరానికి ప్రభుత్వ బస్సు సేవలు అందించడం ప్రారంభించాలి. అభివృద్ధి, భద్రత రెండింటినీ కలిపే మార్గం ఇది. "
ఎన్టీఆర్:
"ప్రజలు మనపై పెట్టిన నమ్మకాన్ని నిలబెట్టే విధంగా పని చేయాలి. అనేక సమస్యలు ఇప్పుడు పరిష్కరించబడతాయి. ఇది నిజంగా ప్రజల విజయం. "
డిసెంబర్ 5, 2024
ఏయూ ప్రాంగణంలో, అసెంబ్లీ హాల్ సమీపంలో, ప్రస్తుత విద్యార్థులు, అధ్యాపకులు స్మృతిలో మునిగిపోయారు. ఆ రోజు, డిసెంబరు 5, వారు మృతులను స్మరించుకుంటున్నారు. పూర్వ విద్యార్థులు, పూర్వ విషయాలు చెబుతుంటే అందరి హృదయాలు బరువెక్కాయి.
విద్యార్థి నాయకుడు:
(గంభీరంగా, స్మృతిని చెబుతూ)
"ఇది ఒక అద్భుతమైన రోజు. డిసెంబరు 5 మన అందరికీ మరువలేని రోజులలో ఒకటి. ఈ రోజు, ప్రసాద్, అనురాధశ్రీల త్యాగాన్ని మనం స్మరించుకుంటూ, వారి ఆశయాలను కొనసాగించడానికి మనం ప్రతిజ్ఞ చేసుకోవాలి. "
అధ్యాపకుల నాయకురాలు:
"ఈ సంఘటన, ప్రజా రవాణా రంగంలో వచ్చిన పరిణామాలను గమనించినప్పుడు, మనం చరిత్రను మరింత సమగ్రంగా అర్థం చేసుకోవాలి. ఎప్పటికీ గుర్తించాల్సినదే అది. వారి ప్రాణం పోయింది, కానీ అది ప్రజల భద్రత కోసం మార్పు తీసుకొచ్చింది. "
మరో విద్యార్థి నాయకుడు (విశ్వసనీయంగా):
"పరిణామాలు కొన్నిసార్లు మనం ఊహించని మార్పులను తీసుకొస్తాయి. ఈ సంఘటన పట్ల ప్రజల ఆవేదన, ఆగ్రహం, నిరసన ఆంధ్రప్రదేశ్ రవాణా రంగాన్ని మార్చింది. ప్రైవేటు బస్సుల నిర్వహణకు వ్యతిరేకంగా జరిగిన పోరాటం ఆంధ్రప్రదేశ్‌లో ప్రజా రవాణా రంగంలో సంభవించిన మార్పులకు కారణం అయ్యింది. "
చరిత్రకారుడు:
(పుస్తకం నుంచి చూస్తూ)
"అంతకుముందు సెక్యులర్ ప్రభుత్వాలు, బస్సుల జాతీయకరణ అంశం గురించి మరింత చర్చించలేదు. కానీ ఈ సంఘటనతో ప్రజల ఆవేదన, ఉద్యమం కొత్త మార్గదర్శకాలు తెచ్చింది. ఇప్పుడు, ఆంధ్రప్రదేశ్‌లో ప్రజా రవాణా వ్యవస్థ ప్రజల జీవన ప్రమాణాలను మార్చేసింది. "
స్మృతి చిహ్నం దగ్గర బెంచీ లో ఇద్దరు విద్యార్థి నాయకులు మాట్లాడు కుంటున్నారు. నక్షత్రాలు వెలుగుతూ నీలాకాశంలో మెరిసిపోతున్నాయి. చల్లటి గాలి వీస్తోంది, అంతా ప్రశాంతంగా ఉంది. దూరంగా ఎక్కడో రాత్రి గువ్వ కూయడం వినిపిస్తోంది. ప్రకృతికి నిద్ర ముంచుకొస్తున్నట్లు కనిపిస్తుంది. విద్యార్థి నాయకులు రవి, తన సీనియర్ నాయకులు సీతతో మాట్లాడు తున్నాడు.
రవి: APSRTC ప్రైవేటీకరణ గురించి ఇటీవల వార్తల్లో చాలా వస్తోంది. అసలు ఏం జరుగుతోంది?
సీతా: అవును రవి, APSRTCలో కొన్ని ప్రైవేట్ పెట్టుబడులపై చర్చలు ఉన్నాయి. కానీ పూర్తి ప్రైవేటీకరణ అయితే జరగలేదు. కొన్ని ప్రాంతాల్లో ప్రైవేట్ సంస్థలతో భాగస్వామ్యం చేస్తున్నారు.
రవి: ఉదాహరణగా?
సీతా: అబ్బి బస్, రెడ్ బస్ వంటి ప్రైవేట్ సంస్థలతో ఆన్‌లైన్ టికెటింగ్ కోసం భాగస్వామ్యాన్ని ప్రారంభించారు. కానీ ఉద్యోగులు దీనిని వ్యతిరేకిస్తున్నారు. ఇది ప్రైవేటీకరణకు మొదటి అడుగు అని భావిస్తున్నారు.
రవి: మరి రిలయన్స్ ప్రైవేట్ పెట్టుబడులు పెట్టే ప్రయత్నం చేసిందని విన్నాను. నిజమేనా?
సీతా: అవును, గతంలో రిలయన్స్ APSRTCని తీసుకోవాలనుకుంది. బస్సులను ఈ-కామర్స్ డెలివరీల కోసం ఉపయోగించాలని ఆలోచన. కానీ ప్రయాణికులు, ఉద్యోగుల వ్యతిరేకత కారణంగా ఇది ముందుకు వెళ్లలేదు.
రవి: ప్రైవేటీకరణ జరిగితే ప్రయాణికులకు ఎలాంటి సమస్యలు రావచ్చు?
సీతా: ముఖ్యంగా చార్జీల పెరుగుదల. ప్రైవేట్ సంస్థలు సర్వీస్ మెరుగుపరిచినా, ప్రజలపై ఆర్థిక భారం పడుతుందని భయం. అలాగే, ప్రభుత్వ సేవల లక్ష్యాలు నెరవేర్చడంలో లోపాలు ఉండొచ్చు.
రవి: మరి ప్రస్తుత పరిస్థితి ఎలా ఉంది?
సీతా: APSRTCను 2019లో ఆంధ్రప్రదేశ్ ప్రభుత్వంలో విలీనం చేశారు. దీనివల్ల 52, 000 మంది ఉద్యోగులు ప్రభుత్వ ఉద్యోగులుగా మారారు. నష్టాలను తగ్గించడానికి ఈ నిర్ణయం తీసుకున్నారు.
రవి: విలీనం వల్ల ఏమైనా మంచి ఫలితాలు వచ్చాయా?
సీతా: ఒకవైపు ఉద్యోగ భద్రత పెరిగింది. కానీ నష్టాలు ఇంకా కొనసాగుతున్నాయి. గ్రామీణ మార్గాల్లో సేవల నిర్వహణ వల్ల లాభం వచ్చే మార్గాలు లేకపోవడం దీనికి కారణమని చెప్తున్నారు.
రవి: ప్రైవేట్ పెట్టుబడులుAPSRTCకి లాభదాయకమా?
సీతా: అది ఇప్పటికీ చర్చనీయాంశమే. ప్రైవేట్ పెట్టుబడులు సరైన పద్ధతిలో ఉంటే సేవల మెరుగుదలకు ఉపయోగపడవచ్చు. కానీ, ప్రభుత్వ నియంత్రణ లేకపోతే ప్రయాణికులపై ప్రభావం ఉండొచ్చు.
రవి: అయితే ఇది ప్రసాద్, అనురాగశ్రీ తో ఆగిపోలేదు. ఇప్పుడు మళ్ళీ ప్రారంభ మయింది.
(ఎయూ, వైజాగ్ లో ప్రసాద్, అనురాగ శ్రీ స్మారక చిహ్నన్ని ఎవరైనా చూడొచ్చు)
సమాప్తం
ఎం. కె. కుమార్ గారి ప్రొఫైల్ కొరకు, మనతెలుగుకథలు.కామ్ లో వారి ఇతర రచనల కొరకు
ఉగాది 2025 కథల పోటీల వివరాల కోసం
మేము నిర్వహించే వివిధ పోటీలలో రచయితలకు బహుమతులు అందించడంలో భాగస్వాములు కావాలనుకునే వారు వివరాల కోసం story@manatelugukathalu.com కి మెయిల్ చెయ్యండి.
మాకు రచనలు పంపాలనుకుంటే మా వెబ్ సైట్ లో ఉన్న అప్లోడ్ లింక్ ద్వారా మీ రచనలను పంపవచ్చు.
లేదా story@manatelugukathalu.com కు text document/odt/docx రూపంలో మెయిల్ చెయ్యవచ్చు.
మనతెలుగుకథలు.కామ్ వారి యూ ట్యూబ్ ఛానల్ ను ఈ క్రింది లింక్ ద్వారా చేరుకోవచ్చును.
దయ చేసి సబ్స్క్రయిబ్ చెయ్యండి ( పూర్తిగా ఉచితం ).
మనతెలుగుకథలు.కామ్ వారి ఫేస్ బుక్ పేజీ చేరడానికి ఈ క్రింది లింక్ క్లిక్ చేయండి. లైక్ చేసి, సబ్స్క్రయిబ్ చెయ్యండి.
గమనిక : పాఠకులు తమ అభిప్రాయాలను మనతెలుగుకథలు.కామ్ వారి అఫీషియల్ వాట్స్ అప్ నెంబర్ : 63099 58851 కు పంపవచ్చును.
రచయిత పరిచయం: ఎం. కె. కుమార్
నేను గతంలో ఎప్పుడో కథలు, కవితలు వ్రాశాను. మళ్ళీ ఇప్పుడు రాస్తున్నాను. నేను పీజీ చేశాను. చిన్న ఉద్యోగం ప్రైవేట్ సెక్టార్ లో చేస్తున్నాను. కథలు ఎక్కువుగా చదువుతాను.
🙏
Comments