గది

#TeluguKavithalu, #Kavitha, #Kavithalu, #TeluguPoems, #BulusuRavisarma, #బులుసురవిశర్మ, #Gadi, #గది

Gadi - New Telugu Poem Written By - Bulusu Ravisarma

Published In manatelugukathalu.com On 22/01/2025

గది - తెలుగు కవిత

రచన: బులుసు రవి శర్మ

ఆ గదిలో అందరూ వున్నారు

గది నిండా నిశ్శబ్దం

నాన్న , అమ్మ

అక్క ,అన్న ,తమ్ముడు

ఇంకా బామ్మ

గది నిండా నిశ్శబ్దం

దిండుని నిలువుగా గొడకానించి

దానికి తన వీపు ఆనించి

సగం జారిన కళ్ళ జోడు తో

జమా ఖర్చుల లెక్కలతో 

కబేళాలో వ్రేలాడే కళేబరంలా

ఆ పరికరం తో కుస్తీ పడుతున్నాడు నాన్న

కొత్త వంటలు, చీరలు

బంగారం ఫ్రీ ఆపర్స్ చూస్తూ

జీవితం మింగేసిన కలలను

ఆ పరికరంలో తడుముతోంది అమ్మ

రీ ఛార్జ్ చేయమన్న 

కొత్త ప్రేయసి మెసేజ్

సాయంత్రం కలిసి ఏం చేద్దాం అన్న మిత్రుల డిస్కషన్ 

లోన్ ఇంకా క్రెడిట్ కార్డ్ ఆఫర్స్

మెసేజ్లను తడుముతూ

అస్తవ్యస్తంగా పెరిగిన

భవిష్యత్ లాంటి గడ్డాన్ని

గొక్కుంటున్నాడు అన్న !

ప్రియుడి సందేశాలను

ఎవరికి తెలియకుండా చదువుతూ

అర్ధ నిమీలిత నేత్రాలతో

ఎర్రబడిన బుగ్గలతో

పరికరాన్ని పొదివి పట్టుకొని 

గుండెల్లో దాచుకుంటోంది అక్క!

వీడియో గేమ్స్ తో మమేకమై

బుగ్గ మీద కుడుతున్న దోమకి

నెత్తురు అప్పజెప్పి

కొత్త లోకంలో విహరిస్తూ తమ్ముడు !

తన చుట్టూ వున్న 

మౌన ప్రపంచాన్ని చూస్తూ

నిస్సహాయంగా 

నిట్టూర్పులు విడుస్తూ బామ్మ !

ఆ గదిలో అందరూ వున్నారు !

గది నిండా నిశ్శబ్దం !!

-బులుసు రవి శర్మ 

https://www.manatelugukathalu.com/profile/bvsr