#TVLGayathri, #TVLగాయత్రి, #TeluguKavithalu, #Kavitha, #Kavithalu, #TeluguPoems, #KsheerasagaraMathanamu, #క్షీరసాగరమథనము, #ఉత్పలమాల, #తేటగీతి
(శ్రీమహా భాగవతపురాణము నుండి అనువాదము )
Ksheerasagara Mathanamu - 1 - New Telugu Poems Written By T. V. L. Gayathri
Published In manatelugukathalu.com On 27/01/2025
క్షీరసాగర మథనము - 1 - తెలుగు పద్యాలు
రచన: T. V. L. గాయత్రి
1.
ఉత్పలమాల.
క్షీరపయోనిధిన్ జిలుక శ్రీకరమౌ సుధకై సురాసురుల్
వారికి తోడుగా నిలిచి వాసిగ కూర్మపు రూపమొంది తాన్
దీరుగ మోసి మందరము దీవెన లిచ్చెను భక్తకోటికా
వారిజనేత్రుడా,హరికి భక్తిగ మ్రొక్కెను విశ్వమంతయున్.//
2.
తేటగీతి.
శ్రోత విష్ణురాతుడువక్త శుకునకెరగి
క్షీరసాగరమున్ దొల్త చిల్కి రెట్లు?
దేవగణములు పొందిన దీనతేమి?
యని యడుగ శుకుడు పలికె ననఘు గాంచి.//
3.
తేటగీతి.
పూర్వకాలమందునబహు పుణ్యులైన
సురసమూహము లోడె నసురుల జేత
తీవ్రమైనట్టి బాధతో తెరలి తెరలి
యమర రాజ్యమున్ గోల్పోయి యడగిరపుడు.//
4.
తేటగీతి.
యజ్ఞ యాగాది కార్యము లాగిపోయె
మునులు యోగులు వగచిరి ముప్పు గనుచు
ధర్మ పరులకు జగతిలో దారిలేక
దుఃఖమొందుచునుదొరలిదొరలిరచట.//
5.
తేటగీతి.
అత్తెఱంగున దేవతలార్తితోడ
బ్రహ్మ దేవుని కడకేగి భక్తికదుర
తలలు వంచుచు తమ బాధ తెలుపు కొనుచు
నిలిచియుండిరి దీనులై నిలువలేక//
6.
తేటగీతి.
చిత్తమందున జిష్ణుని స్థిరము చేసి
నవ్వు మోముతో నప్పుడు నలువ పలికె
''దివిజ వరులార!విష్ణుని దివ్యమైన
శక్తి నిల్పునీ జగతిని శాశ్వతముగ.//
7.
తేటగీతి.
పాదపంబులు గిరులును పక్షి గణము
పశువులున్ మీరు నేనును పంచముఖుడు
జన్మమొందితిమా హరి సంతరించ
జ్ఞాన మయుడైన విష్ణుండు జయము నొసగు.//
8.
తేటగీతి.
సత్త్వగుణముతో నలరారు శార్ఙ్గపాణి
శుభఫలంబుల నొసగునీ శోభనుండు
వాని పాదముల్ బట్టిన భయము తొలగు
మౌని హృదయనివాసుండు మనకు దిక్కు".//
9.
తేటగీతి.
ఇట్లు వచియించి స్రష్టతా నిరవుగాను
సురల గూడి వైకుంఠమున్ జొచ్చెనపుడు
పరమ తేజోమయంబైన పథము గాంచి
నచ్చెరువు నొంది రచ్చట యమర వరులు.//
టి. వి. యెల్. గాయత్రి.
పూణే. మహారాష్ట్ర.
Profile Link:
క్షీర సాగర మథనం: గాయత్రి టీవీ ఎల్
కొన్ని విషయాలు అర్ధమయ్యి ... పురాణం లోనివి తెలుసుకున్నాం
... చాలా మటుకు సంస్కృత పదాలు అర్థం కాలేదు, కష్టమైన తెలుగు
తేలికైన తెలుగు లో వ్రాయమని మనవి.
పి.వి. పద్మావతి మధు నివ్రితి