క్షీరసాగర మథనము - 19
- T. V. L. Gayathri
- Apr 5
- 2 min read
Updated: Apr 8
#TVLGayathri, #TVLగాయత్రి, #TeluguKavithalu, #Kavitha, #Kavithalu, #TeluguPoems, #KsheerasagaraMathanamu, #క్షీరసాగరమథనము, #తేటగీతి, #సీసము
(శ్రీమహా భాగవతపురాణము నుండి అనువాదము )
Ksheerasagara Mathanamu - 19 - New Telugu Poems Written By T. V. L. Gayathri
Published In manatelugukathalu.com On 05/04/2025
క్షీరసాగర మథనము - 19 - తెలుగు పద్యాలు
రచన: T. V. L. గాయత్రి
ఇక క్షీరసాగర మథనము - 19 చదవండి..
104.
తేటగీతి.
ఇవ్విధంబుగ నసురజాతెఱుకలేక
పోరుచుండి యమృతమును బొందరకట!
చతురుడైనట్టి విష్ణుండు సంతసముగ
మోహినీ రూపమున్ గొని మోసపుచ్చె!//
తాత్పర్యము.
ఈ విధంగా రాక్షసజాతి విష్ణుమాయను తెలిసికొనలేక అమృతము కోసము తగవులాడుకొంటూ ఉన్నారు. అప్పుడు తెలివిగలవాడైన విష్ణుమూర్తి నవ్వుతూ మోహినీరూపముతో వచ్చి ఆ రాక్షసులను మోసపుచ్చాడు.//
105.
సీసము.
మేఘవర్ణంబుగ మేను మెఱయుచుండ
మోమున వాలెనా ముంగురులట
సర్వభూషణములన్ సర్వావయములందు
చంచరీచికుర సవరణించి
మల్లెలమాలలన్ మక్కువఁ ధరియించి
చందనాదులలది జాణమెరసి
పలువరుసతళుకు ప్రస్ఫురిల్లగ తాను
లజ్జతో నగుచుండి లలన నిలిచె!/
తేటగీతి.
మోహినీరూప మొందిన పురుషవరుడు
స్నిగ్ధమై తిరుగాడంగ చిత్తమందు
మోహమొందిన దైత్యులు మురిసి మురిసి
విస్మయంబుగ గాంచిరా వెలదిసౌరు!//
తాత్ పర్యము.
నల్లని మేఘము వలె మోహిని దేహము మెరుస్తూ ఉంది.ఆమె ముఖము మీద ముంగురులు వాలుతున్నాయి. ఆ నెరజాణ వంటినిండా చక్కని నగలు పెట్టుకుంది. జడలో మల్లెపూవుల మాలలను తురిమింది. తనువంతా చందనము పూసుకొంది. ఆమె పలువరుస తళుకుమనేటట్లు, కొంత సిగ్గుతో నవ్వుతూ అక్కడ నిలుచుంది. పురుషోత్తముడైన విష్ణువు మోహినీరూపమును పొంది అక్కడ తిరుగుతూ ఉంటే ఆ రాక్షసులు మోహముతో మురిసిపోయి, చాలా విస్మయాన్ని పొంది ఆ సుందరి యొక్క సొగసును అలా చూస్తూనే ఉన్నారు.//
(సశేషం )
టి. వి. యెల్. గాయత్రి.
పూణే. మహారాష్ట్ర.
Profile Link:
댓글