క్షీరసాగర మథనము - 20
- T. V. L. Gayathri
- Apr 8
- 2 min read
Updated: 7 days ago
#TVLGayathri, #TVLగాయత్రి, #TeluguKavithalu, #Kavitha, #Kavithalu, #TeluguPoems, #KsheerasagaraMathanamu, #క్షీరసాగరమథనము, #తేటగీతి
(శ్రీమహా భాగవతపురాణము నుండి అనువాదము )
Ksheerasagara Mathanamu - 20 - New Telugu Poems Written By T. V. L. Gayathri
Published In manatelugukathalu.com On 08/04/2025
క్షీరసాగర మథనము - 20 - తెలుగు పద్యాలు
రచన: T. V. L. గాయత్రి
ఇక క్షీరసాగర మథనము - 20 చదవండి..
106.
తేటగీతి.
లలన మోమును గాంచుచు లలిని జూపి
నసుర నాయకుల్ ప్రేమతో నడిగిరపుడు
"పసిడి వన్నెలు కల్గిన పడతి తెలుపు
నీదు పరిచయంబును మాకు నెనరుతోడ!//
తాత్పర్యము.
రాక్షసులు ప్రేమతో ఆ మోహిని ముఖాన్ని చూస్తూ ఇలా అడిగారు.
"బంగారు వన్నెతో ఉన్న ఓ యువతీ!నీ పరిచయాన్ని ప్రేమతో మాకు తెలుపు!//
107.
తేటగీతి.
తరుణి!చారణ కిన్నెర దైత్య, దివిజ,
యక్ష జాతుల నీవంటి యతివ కలదె?
నిన్ను పొందెడి వారలు నిశ్చయముగ
జగతి నేలుట తధ్యమౌ జయము కలుగు!//
ఓ తరుణీ!చారణ,కిన్నెర, రాక్షస, దేవ, యక్ష జాతులలో నీ వంటి స్త్రీ ఉందా? (లేదు )నిశ్చయముగా నిన్ను పొందిన వారు ఈ ప్రపంచాన్ని గెలుస్తారనటం కచ్చితంగా జరుగుతుంది.//
108.
తేటగీతి.
అసురజాతికి లభియించె నమృతమిపుడు
తగవు పుట్టెను మాలోన తగిన రీతి
తగవు తీర్చెడి తెలివైన దానవీవు
ప్రతిభ చూపుచు నమృతమున్ బంచిపెట్టు!//
మా రాక్షసజాతి కోరిక మేరకు అమృతం దొరికింది. కానీ దాని కోసం మాలో మాకు తగవు పుట్టింది. ఈ తగవుతీర్చే తెలివైనదానివి నీవు. నీ ప్రతిభతో మాకు ఈ అమృతాన్ని పంచిపెట్టు!//
109.
తేటగీతి.
నీవు మా వెంట చనుదెంచి నెమ్మితోడ
నమృతమున్ గృపతో పంచి యాదరించ
భువనముల్ గెల్చు కొంచును బొంగిపోయి
పాదముల్ పట్టి కొల్తుము పడతి నిన్ను!"//
ఓ!అమ్మాయీ!నీవు మాతో వచ్చి అమృతమును పంచితే, మేము ఈ లోకాలన్నింటిని గెలుస్తాము!అంతేకాదు నీ పాదాలను ఎప్పుడూ పూజిస్తాము!"//
(సశేషం )
టి. వి. యెల్. గాయత్రి.
పూణే. మహారాష్ట్ర.
Profile Link:
Comments