#TVLGayathri, #TVLగాయత్రి, #TeluguKavithalu, #Kavitha, #Kavithalu, #TeluguPoems, #KsheerasagaraMathanamu, #క్షీరసాగరమథనము, #తేటగీతి, #కందం
(శ్రీమహా భాగవతపురాణము నుండి అనువాదము )
Ksheerasagara Mathanamu - 3 - New Telugu Poems Written By T. V. L. Gayathri
Published In manatelugukathalu.com On 29/01/2025
క్షీరసాగర మథనము - 3 - తెలుగు పద్యాలు
రచన: T. V. L. గాయత్రి
25.
తేటగీతి.
దేవదేవుండు విష్ణుండు దివ్యమైన
పీతవస్త్రమున్ దనువున వివిధరత్న
భూషణంబులన్ మురియుచు పుణ్యమొసగు
వైజయంతిమాల ధరించి వచ్చి నిలిచె.//
26.
కందం.
శివుడును బ్రహ్మయు సురలును
స్తవములు సల్పుచును తాము సాగిలపడగన్
ప్రవిమల హృదయుండగు హరి
జవసత్త్వముల నిడువాడు సంతసమొందెన్.//
27.
తేటగీతి.
చిరుమందహాసంబును జిల్కు చుండి
చిన్మయాకారుడు సురలన్ జేరబిలిచి
బోధ సేయ దొడంగె తా బుణ్యమలర
'ధర్మగతిలోన చరియించి తరల వలయు.//
28.
తేటగీతి.
కార్యసాధకు లెంచరు కాలగతిని
గుణము కల్గిన వారలు కూర్మి తోడ
శత్రువర్గంబు తోడుతన్ సంధి పొసగి
యుండునట్లుగ జూచుట నుత్తమంబు.//
29.
తేటగీతి.
గూఢమతులౌచు కార్యమున్ గొఱతలేక
సాధనంబుతో మేలుగన్ సల్పవలయు
నమృతంబును బొందంగ నసుర జాతి
కలిసి వచ్చును మీతోడ కరము కలిపి.//
30.
తేటగీతి.
క్షీరజలనిధిన్ జిల్కంగ సిద్ధ పడుచు
మొట్టమొదటగా నౌషధమూలికలను
వృక్ష రాశులన్ ధాన్యముల్ వెదికి దెచ్చి
జలము లందున కలుపుడు జయముకోరి.//
31.
తేటగీతి.
మందరాచలమున్ గొని యబ్ధి నిలిపి
వాసుకిన్ రజ్జువుగ జేసి వాసితోడ
మీర లసురుల నోర్మిమై చేరియుండి
సాగరంబును మథియింప జయము కలుగు.//
32.
తేటగీతి.
శాంతగుణముతో కార్యమున్ జక్కబెట్టి
శ్రమను ధారగా బోసిన సత్ఫలితము
పొంది సుఖముగా జీవించి పుణ్యమలర
జాతి రక్షణ జేయుడు సంతసముగ.//
33.
తేటగీతి.
క్రోధగుణమును విడనాడి కూర్మితోడ
నసుర జాతితో మైత్రిని పొసగుచుండ
నమృతంబును సాధించి యమరతతికి
జీవమీయగా మీకున్న చింత దీరు.//
34.
తేటగీతి.
దివిజవరుల నాదేశించి దీవెనలిడి
చక్రధరుడుతా నగవుతో సాగిపోవ
శంకరుండును బ్రహ్మయు సంతసముగ
వెడలిపోయిరి కీర్తించి వెన్నునపుడు.//
35.
వచనము:
తదనంతరమున ఇంద్రాది దేవతలు అసుర చక్రవర్తియగు బలి యొద్దకు వెళ్ళిరి.//
టి. వి. యెల్. గాయత్రి.
పూణే. మహారాష్ట్ర.
Profile Link:
Comments