#TVLGayathri, #TVLగాయత్రి, #TeluguKavithalu, #Kavitha, #Kavithalu, #TeluguPoems, #KsheerasagaraMathanamu, #క్షీరసాగరమథనము, #తేటగీతి
(శ్రీమహా భాగవతపురాణము నుండి అనువాదము )
Ksheerasagara Mathanamu - 6 - New Telugu Poems Written By T. V. L. Gayathri
Published In manatelugukathalu.com On 03/02/2025
క్షీరసాగర మథనము - 6 - తెలుగు పద్యాలు
రచన: T. V. L. గాయత్రి
50.
వచనం.
బ్రహ్మ,దేవతలు మరియు ప్రజాపతులు సదాశివుని యిట్లు స్తుతించిరి.
51.
ఉత్పలమాల.
పాలన జేయు దేవరవు భక్తవశంకర!లోకపాలకా!
తాలిమి జూపరావ వరదానము నీయవ!జాగుసేయగా
తాళగలేము స్వామి!పరితాపము దీర్పగ వేగరావ!మా
పాలిటి ప్రాణబంధుడవు బాధలుబాపెడిదారిచూపుమా!//
తాత్పర్యము :
జగతిని పాలన చేయు దేవుడవు!భక్తులకు బందీయైనవాడా!దయను జూపవా!వరముననుగ్రహించవా!నీవు ఆలస్యము చేస్తే తాళలేము స్వామీ!వేడిని తగ్గించగా రావా !మాకు ప్రాణబంధువుడవు!బాధలు తొలిగిపోవు దారిచూపవా!శంకరా!//
52.
మత్తకోకిల.
కాలకూటవిషంబు కాల్చెను గాంచుమా స్థితి శంకరా!
జాలి చూపుమ!భీతిమాన్పుమ!చంద్రశేఖర!పాహిమామ్!
వేళమించిన భస్మరాశిగ విశ్వమంతయు దగ్ధమౌ!
ఫాలలోచన!రమ్ము!వేగమె!ప్రార్థనల్ విని కావుమా!//
తాత్పర్యము.
కాలకూట విషము కాల్చు చున్నది మా పరిస్థితిని చూడుమా!కాస్త జాలిని చూపుమా!భయాన్ని తొలగించు!చంద్రశేఖరా!నిన్ను శరణు వేడితిమి!నువ్వు ఆలస్యం చేస్తే విశ్వమంతా దగ్ధమై భస్మరాశిగా మిగులుతుంది. ఫాలలోచనా!మా ప్రార్థనలు విని వేగమే రావయ్యా!//
53.
మత్తకోకిల.
జీవదాతవు విశ్వరక్షక!సిద్ధసేవిత!శ్రేయమీయుమా!
స్థావరంబుల, వృక్షరాశుల జన్మబీజము నీవెగా!
దేవనాయక!యీ జగంబుల తీరు తెన్నులు గాంచుచున్
ద్రోవజూపుచు నాది దేవుడ!తొల్గ జేయవె కష్టమున్.//
తాత్పర్యము.
జీవమునిచ్చే వాడవు!విశ్వరక్షక!క్షేమాన్ని కలుగచెయ్యి!ఈ జగతిలో సర్వమైన జడ చైతన్య రూపములకు నీవే మూలము. దేవతల నాయకుడవు!ఈ జగత్తును ఎలా నడిపించాలో తెలిసిన ఆదిదేవా!మా కష్టమును పోగొట్టుము!//
54.
ధ్రువకోకిల.
కలుషితంబగు మిత్తి పుట్టెను కాటువేయగ మమ్ములన్
బ్రళయ నాట్యము సల్పుచుందువు ప్రాణికోటిని కూల్చగన్
విలయతాండవ మాపి జూతువు విశ్వసృష్టికి మూలమౌ
కళలు పెంచెడి శంకరా!మము కన్నతండ్రిగ బ్రోవుమా!//
తాత్పర్యం.
మమ్మల్ని కాటు వేయగా కలుషితమైన మృత్యువు పుట్టింది. ఈ జగత్తును లయము చేయటానికి ప్రళయతాండవమును చేస్తూ ఉంటావు. మరల ఆ విలయతాండవము ఆపివేసి విశ్వసృష్టిని చేయటానికి మూలమౌ చైతన్య కళలను వెదజల్లుతావు. ఓ శంకరా!మమ్ము తండ్రివలె కాపాడుకోవయ్యా!//
టి. వి. యెల్. గాయత్రి.
పూణే. మహారాష్ట్ర.
Profile Link:
Comments